" تفرست ملامحه محاولًا اختراق صدره لمعرفة نواياه، لكن الفتى جامد الوجه لا يجفل له رمش، لم أفلح في الصبر أمام مقاومته وسيل كلماته المنهمرة لإقناعي، فقاطعته قائلًا:
- شوف.. كل حاجة حوالينا عدت على مزاد قبل ما تجيلنا، الكهربا اللي بتنور بيتك الشركة الإنجليزي كسبتها بالمزاد، المية اللى بنشربها من الكوبانية رسيت عليها بالمزاد، الخضار والسمك والفاكهة اللي بتاكلها، كلها من تجار اشتروها في مزاد.. العربية المستعملة اللي بنركبها، الخواتم والمجوهرات وعفش البيوت والسجاد واللوحات، كل حاجة تقريبًا بنستعملها، المزاد حياة موازية.. أنت نفسك معروض في مزاد.. بس منتظر دورك. "